torsdag 12. april 2012

Familiens nye favorittrom

I huset vårt har me eit gjesterom. På gjesterom står den gamle, fine dobbeltsenga som me fekk overta med huset, og som navnet seier: her får gjestene våre sove.
Men det ville jo vere synd å la rommet stå heilt ubrukt, sånn til dagleg. Difor tok Rosamannen sist haust grep, og gjorde rommet om til "gutterom". Her hengde han opp dartskive, gitarane sine, sette opp el-piano, opptaksutstyr og stereoanlegg.


Så, til jol, fekk jentene våre Nintendo Wii, med ein god del ekstrautstyr. Dette vart ståande i stova, sidan vårt einaste fjernsyn heng der. Men brått, no i vinter, dukka det opp ein ny flatskjerm i heimen. Dvs, ein ny brukt, på veg ut av heimen til ein kjenning. Den kom rett på veggen på gutterommet, og dermed rauk spelemaskina også opp dit.

Mor reiste på S&S og kjøpte dei største putene dei hadde, 90x90 og nokon litt mindre. Stoff og glidelåsar vart sjølvsagt også med i vogna, saman med to digre fleece-tepper,og etter eit par kveldar på arbeidsrommet kunne me innvie det ny-gamle rommet, no kalla spelerommet.


Her kan alle slange seg i den store "dagsenga", lent oppi dei mjuke putene, eller den digre bamsen som storesyster vann i Dyreparken for eit par år sidan. Veggane er akurat så gusjegul/grønne som dei var då me overtok huset, golvet er brunt, men nytt vindauge og lister er iallefall komme på plass...


Stova er litt mindre full, og familien har fått eit nytt favorittrom!

måndag 9. april 2012

På tampen av påska

Siste dagen av påska 2012 er eit faktum. I morgon er det striskjorta og havrelefsa att, og som vanleg etter ei rekkje fridagar er eg litt usikker på om eg er klar for kvardag igjen.
Småperler er svært populært i heimen. Storesyster har perla søte påskeharar, som har fått bu i påskelilja på stovebordet.

Noko anna som er vanleg er at fridagane har gått alt for fort. Me har hatt litt heimepåske, litt besøk hjå gode vener, og litt besøk hjå familien på begge sider. Dei gode venene bur i Bergen, og dermed vart det litt bypåske for oss. Onsdag var det sol, og me nytta sjansen til ein tur på Fløyen for å gå på skattejakt/natursti. Me hadde ikkje heilt teke med i berekninga at det var snø og slaps over store delar av området, ei heller at skattejakta gjekk i "bushen", og ikkje langs det store nettet av grusvegar.. Dermed stillte 3 av familiemedlemene i joggesko (far sine i lær, heilt utan mønster i dei tynne sålane), 2 utan hue, 1 i rosa "pels" og minikjole..



Etter å ha gjennomført heile jakta var siste etappe ned unnarennet i Granbakken, ein hoppbakke som har samla 10 000 menneske på 50-talet. I botnen av bakken var det laga til ein bålplass, og her satt det fleire familiar og koste seg i sola. Eg har berre eitt stikkord: Bergans-gjengen. Eg tenkjer dei lo godt, då dei såg oss, som nok såg ut som skikkelege byfolk på tur, i våre "uniformar"! ;)

Her gjekk det tydelege skiljet mellom vinter og vår, på Fløyen.

Unnarennet i Granbakken
Jentene i ivrig oppgåveløysing.

Til slutt, eit bilde frå påskeaftan heime hjå foreldra mine. Heile familien var samla, og etter eit fantastisk måltid var (nesten) heile søskenbarnflokken ute på bakkane og leikte Rødt Lys og Tante Knute. Dei yngste er 4 1/2, den eldste - kjærasten til yngste bror min - er 20. Utruleg stas!


Idag er eg gjenforent med mine gode vener Paracet og Otrivin, etter fleire veker utan deira selskap. Satsar på at samveret ikkje blir for langdrygt denne gongen.

Håpar de der ute har hatt ei god påske, og er klar til ny veke!
Related Posts with Thumbnails