Om ei veke er det showtime!

Dei som er innom jamnleg har nok skjønt på innlegga mine at det er litt hektiske tider, der hovudet til Rosa ikkje alltid heng med i svingane (heldigvis ikkje heilt bokstaveleg talt!). Mykje av grunnen er den du ser her:

Øverste del av plakaten er GBS-trio sin standardplakat. Nederste del er min ;)

Musikklaget "mitt" skal ha konsert saman med Gisle Børge Styve Trio, og det er ganske mange små og store trådar som skal samlast for at resultatet skal verte bra. Det er travelt, og samtidig veldig kjekt - iallefall om alt går bra til slutt! Neste laurdag brakar det altså laus i det nye kulturhuset på Voss, og skulle du ha lyst til å ta turen så er du meir enn velkomen! Du kan lese meir om konserten her, og endåtil sikre deg ein god plass på førehand, dersom du gjer det her.

Velkomen til ein storkveld i kulturhuset!

Winter wonderland

Årets vinter er snørik, lang og kald. Snøen la seg tidleg i desember, og har ikkje vore i nærleiken av å forsvinne, trass at me for ei tid sidan hadde 2 veker med regn. Seinare har det komme meir og meir snø, og me har nok rundt meteren no. Småvegane er islagde, medan dei større vegane heldigvis er stortsett bare.

Dei siste dagane har det vore kaldt og klart, med isande kald vintersol mot gneistrande kvit snø. Sundag var òg ein slik dag, og det var ein av dei svært sjeldne dagane der eg klødde i kroppen etter å komme meg ut i snø og sol, gjerne på eit fjell i nærleiken. Men, mannen i huset var ikkje i slag, og strengt tatt var det litt kaldt for å legge ut på fjelltur med mine to små. Det hadde eg nok uansett ikkje gjort utan mannen.

Men ut måtte me! Eit par tekstmeldingar seinare hadde me fått oss turselskap. Kakao vart kokt, og bollar (heimebakt på bakeriet ;) ) putta i sekken. Så gjekk me dei få metrane opp i bakkane som høyrer til foreldra mine sin gard. Der var eg sjølv alltid på ski eller i snøleik når eg var liten. Det vart laga sitteplass i sola, og etterkvart fekk me selskap av fleire, både to- og firbeinte. Jentene aka og basa i snøen saman med gode vener, og dei vaksne kunne nyta solstrålane med ein kopp kaffi, ispedd eit par redningsaksjonar for dei som hadde gått seg fast i snøen.

Me hadde eit par nydelege timar der ute i bakkane, og eg tenkte med meg sjølv då me kom innatt - kven i all verden treng å reise til fjells når ein har rikelegt med snø, sol, kakao og godt selskap rett utom stovedøra?

God helg i vente, bloggvener! Her satsar me på at omgangssykja som la prinsessene ned for telling sist natt, ikkje gjer det same med oss vaksne i helga. DET har me ikkje tid til ;)

Griseflaks - del 2!

I forrige innlegg skreiv eg om kortmappa mi, som kom til rettes på mirakuløst vis etter ei veke i eksil.
Igår forsvann husnøklane mine, akurat etter at huset vart låst for dagen, og eg skulle ha med meg to ungar og 14 pakkenellikar bort til bilen i ein viss fart. Eg fann det ut då eg 5 minuttar seinare skulle innatt for å hente den før nevnte kortmappa, som framleis låg i skjørtelomma der ho vart lagt laurdag kveld....
Eg saumfòr dei to små vegstubbane der eg kunne ha mista nøklane, eg tømte veska, og snudde bilen opp-ned og rista han. Spurde i barnehagen og leita gjennom klesbyte-veskene til jentene. Nøklane var ingen stad å sjå!

På toppen av dette hadde min kjære ein lang dag på jobb, og reservenøkkelen som brukar å ligge ein hemmeleg stad hadde på mystisk vis flytta seg inn i gangen! Etter enda arbeids-, skule-, og barnehagedag måtte me difor evakuere heim til foreldra mine sitt hus, det me til alt hell fekk både mat og varme.
Klokka halv sju kom me oss omsider heim, framleis utan nøklar, trass ny leiting gatelangs.

I ettermiddag, då eg på veg til barnehagen passerte parkeringsplassen kom eg plutseleg på at eg hadde lagt nøklane på biltaket for å hjelpa Storesyster i ein fart om morgonen. Det hadde berre gått så fort at eg heilt hadde gløymt det! Der var forklaringa, og eg såg for meg leiteaksjonar langs større vegar...heilt til eg såg at det sat noko heilt bak på taket på bilen. Eg trudde ikkje eit sekund at det var mogleg - det måtte vere ein kvist eller noko som hadde sett seg fast, men jau - der hang dei - klemt mellom "railen" og taklista. Der har dei hengt, tilsynelatande godt planta, medan eg har kjørt til skule, barnehage og 2gongar t/r Voss!!!

Snakk om griseflaks!