torsdag 13. januar 2011

Reisefeber?



(Biletet er sjølvsagt lånt på verdsveven)
Om ca 27 timar går alarmen i Rosaheimen. Ja, vekkerklokkealarmen altså. Familien Rosa skal nemleg stå opp kl 03.45 natt til laurdag og setje seg i bilen for å rekke flyet som går kl 07.10 frå Flesland. På det vinterføret me no har treng me god tid til turen, og det ville jo vere dumt å stå att med kofferten i handa og sjå flyet med våre medreisande forsvinne opp i det blå (grå), ikkje sant?

Heile veka (og fleire veker før) har jentene hatt nedtelling, og særleg Storesyster har hatt tallause spørsmål om turen og byen og kva me skal gjere der. Musicalen "We will rock you" står på planen, og me har høyrt på musikken i bilen dei siste dagane. Dei små tuppene rockar til rytmane, så me får håpe der er ein liten danseplass mellom benkeradene som dei kan vrikke litt på. Me ynskjer oss i tillegg ein tur med det enorme pariserhjulet "London Eye", som visst skal vere fantastisk. Fellesprogrammet lyder òg på to museumsbesøk, men me får sjå kor mykje av dette me har tålmod til.....

Min plan er å komme meg på ein scrappebutikk eg har vorte tipsa om, som til alt hell skal ligge ein 7 minuttars spasertur frå hotellet vårt i enden av Oxford Street! Den siste dagen skal me dessutan til Brighton (og ingeniørane skal besøke ein motorfabrikk eller noko slikt), som skal vere full av bruktbutikkar og liknande. DER har eg tenkt å tilbringe tida medan dei andre ser på maskiner ;) (og har nokon tips til butikkar eller stader me MÅ sjå på dei 4 dagane me er i storbyen, så kom med dei!)

Så får me berre håpe at planen om å legge oss saman med jentene imorgon sler til, og gjer at me kan få ein bra dag laurdag òg, sjølv om den startar lenge før den burde. Rosamannen skal ha laptop med seg, men eg trur min skal få stå heime og kvile seg. Eg satsar på at eg får låne hans, dersom det skulle bli ein kveld eller to i ro og mak på hotellet med prinsessene.

Då er det berre ein ting å sei: Mind the gap!

(Og skulle nokon ute i den gale verda vurdere å avlegge Rosaheimen ein visitt medan me er på tur, så er det berre å gløyme; gode hjelparar har lova at verken huset eller katten vert einsame - på førehand takk for hjelpa!)

tysdag 11. januar 2011

Snø, snø, og meira snø...

Her vest er det iallefall ingen grunn til å klaga på vinteren! ca 60-70 m snø, og brøytehaugen nedanfor huset vårt er nok vorte omtrent 3 meter høg iløpet av kvelden.
Det var så vakkert ute igår, med snøtunge greiner på trea, og snøen som framleis dala ned. Det var jo òg eit fint høve til å få testa fjernutløysar og kamerastativ, sidan lukkartida vart på ca 30 sekundar ut mot det mørke vatnet. Og medan eg stod der og leika meg kom snøplogen feiande forbi, og laga ei fin, gul fartsstripe på biletet mitt. Snøen som dala nedover har laga kvite "renner" på bileta, pga den lange lukkartida. Ein annan gong skal eg prøve å "fryse" dei i fallet, men då må det vere dagsljos!



søndag 9. januar 2011

Heilage 3 kongars-fest

Idag har jola vorte avslutta heilt på skikkeleg her i Rosaheimen. All jolepynten er pakka sirleg ned (og måtte utvidast med ei ny kasse for å få med alt!) og rydda på loftet, og det kjennes både godt og vemodigt. Vemodigt fordi eg syns det er så fint med ljosa i vindaugene og på treet, og godt fordi det trass alt vert litt betre plass i stova utan eit stort tre midt i den!

Som fylgje av dette har eg fått eit par tankar om nokre ting eg vil flytta litt rundt på, men foreløpig er det mest oppi toppen denne mini-ommøbleringa føregår.


Men det er ikkje berre her i heimen jola har vorte avlsutta. Eg og jentene var til kyrkjes idag, på det som har vorte kalla Heilage 3 kongarsgudsteneste. Torsdag var 13. dag jol, og dagen som vert kalla heilage 3 kongars-dag, og denne vart feira i kyrkja vår idag. I gudstenesta fekk me høyre historia bak pyntinga av jolatreet, og det som stod i kyrkja hadde forutan ljos og glitter kun pynt som kunne haustast og puttast i munnen. Det var epler (og sjokoladekuler som symbol for det samme) - til minne om syndefallet, runde pepperkaker - som symbol på nattverdsbrødet, kakemenn og -damer - som symbol på Adam og Eva, hjerter - som symbol på Guds kjærleik, og stjerner - som symbol på Betlehemsstjerna


Som seg hør og bør i ein jolatrefest (men som ikkje er så vanleg i kyrkja), gjekk me rundt jolatreet og song tradisjonelle jolesongar. Små og store, unge og gamle hand i hand. Det syns eg er ganske fint!


Og til sist kom vel det iallefall den yngre garde såg på som høgdepunktet; det var tid for å hauste jolatreet! Ivrige hender plukka ned sjokoladekuler, epler og kaker, som alt saman gjekk ned på høgkant. Tilbake stod eit nokså ribba jolatre........


Eg syns det var kjekt å få litt jolatrehistorie, og haustinga passa godt med mi eiga "hausting" her i heimen. Eg har dessutan fått nokre idèar for neste års pynting...

Heilt til slutt litt sjølvskryt, for invitasjonen som vart sendt til alle familiar med born i barneskulen er det eg som har laga frå grunnen av. Som eg har nevnt tidlegare har eg ein kjempefin jobb, der eg i tillegg til dei meir tradisjonelle kontor-oppgåvene får leike designar innimellom. Det set eg stor pris på!

Då er det vel berre å samle krefter til ei ny veke, som nok vert fylt av spenning, litt reisefeber, og førebuingar til London-turen vår neste helg.

God veke!

Test av blogwriter for iPhone


...med eit mobilbilde av dei to snuppene dom kosar seg med popcorn og film idag. :) eit "skikkeleg" innlegg kjem forhåpentlegvis om litt.
Related Posts with Thumbnails