fredag 7. januar 2011

Voss Kulturhus - bygdas nye storstove!

Igår tok rosafamilien turen til Voss, for å vere med på ei verkeleg storhending; Det nye kulturhuset vart offisielt opna! I prosessen med bygget har det vore mange og delte meiningar, om alt frå pengeforbruk til utforming. Eg har ikkje vore veldig engasjert, men når huset no står der, med glasveggar mot Vangsvatnet og moglegheit for å gå på taket, ja då syns eg det er flott!

Opningssermonien hadde nesten olympisk preg, med paraglidarar som landa på og ved sida av huset, fakkeltog, og noko som kunne minne om tenning av den olympiske ild. Med i denne delen av seremonien dukka dessutan ein av mine fine nevøar opp, som representant for dei yngre brukarane av huset. Kjempekjekt! Utvandra vossingar, som Kari Traa, Linda Eide og Arne Hjeltnes var sentrale i opninga, og fylkesmann Lars Sponheim fekk nok stjerne i margen hjå mange vossingar då han kalla Voss for "kulturbygd nr 1 i Noreg"!

Storesyster var utanfor kulturhuset tidlegare på dagen, då alle barneskulane i kommunen vart inviterte til å bygge isskulpturar rundt heile bygget (bildet nederst). Dei lyste flott opp i vintermørkret seinare på kvelden, når faklane inni var tende.
For vår del vart kvelden avslutta med flammeblåsaren på bileta - ganske imponerande! For dei 290 gjestene som var særskild inviterte vart det konsert i Kultursalen, der det i tillegg til talar og musikk vart overrekt ei gåve frå Voss Sparebank - eit splitter nytt konsert-flygel frå Steinway & Sons!
I mars skal me ha konsert med musikklaget i denne salen, og det gler eg meg verkeleg til. Særleg når gjestene er ingen ringare enn Gisle Børge Styve (jepp, han i Beat for Beat), og hans to kompanjongar!







Tillukka med den nye storstova, vossingar!

tysdag 4. januar 2011

Vinterdag

Me har hatt mange av dei i det siste. I lokalavisa stod det idag å lesa at den desembermånaden som no har gått har vore den kaldaste sidan offisielle målingar starta rundt år 1900. Det har vore så kaldt at me ikkje har vore mykje ute med småjentene - særleg ikkje den minste tuppa.

Men no når me runda nytt år har temperaturane stige, og sundag var ein nydeleg klar dag med berre rundt 5 blå grader. Perfekt for ein tur ut, sjølv om det var glatt og til dels uframkomelegt i bygda. Eg hadde sjølvsagt kamera med meg, og utforska forskjellane mellom stor og liten blendaropning, og kva det gjorde med djupn-kjensla i bileta. Og sjølvsagt måtte eg knipse dei små blånissane som fann seg nokre tunellar i ein snøhaug.
Idag var det fyrste dag på jobb, skule og barnehage hjå oss. Igår var det planleggingsdag, og den nytta me til besøk hjå tannpleiar, fotograf, lensmann og bilverkstad. Litt hit og dit, med andre ord. Men no har me iallefall fått kontrollert tennene til begge prinsessene, og skaffa pass til minstemor som skal ut av landet for fyrste gong når me reiser til London om 11 dagar. Vår eigen bil er henta heim, og svigermor sin levert tilbake i omtrent samme stand som før ;)

Idag har dessutan eg og Rosamannen gått tilbake til lavkarbo-kosthaldet, som elles har vore livsstilen sidan mai ifjor. Etter ein jolepause føles det supert å komme igang igjen! Eg var litt bekymra før helga, sidan eg kom på at me ikkje hadde opna ein einaste kakeboks her heime. Det problemet vart løyst då me inviterte familien min, og det dukka opp i alt 5 vaksne og 8 born som iløpet av ettermiddagen ekspederte bortimot alle småkakene. Det kjekkaste var likevel å ha det jolepynta huset fullt av folk i avslappa omstende. Jolepynten har eg endå, og den skal få stå til helga, har eg tenkt. Då har me passert 13. dag jol, og sjølv om eg kvir meg litt til å hive ut alle dei varme ljosa i vindauger og på jolatreet, så er det vel på tide då.

Mykje kvardagsliv i dagens innlegg, ispedd ein liten fotomontasje frå sundagsturen vår. Håpar du har hatt ein god start på veka!
Related Posts with Thumbnails