historia om eit badekar

Den som fylgjer med på bloggen min veit at me er midt i ei aldri så lita oppussing i huset vårt. Mellom anna er badet under opparbeiding, som eg skreiv om i forrige innlegg. Der nevnte eg òg at eg hadde bestillt badekar, som me håpa ville komma iløpet av veka.....

Dette badekaret vart bestillt tysdag kl 11, og forventa leveringstid hjå badeeksperten.no var 1-7 dagar. Når det står 1-7 dagar tenkjer eg automatisk "ei veke og vel så det". Tysdag kveld kom eg meg tidleg i seng, i håp om å vakna med fornya krefter og pågangsmot dagen etter. Som vanleg sette eg på både mobil og vekkjarklokke, så me skulle komma oss opp kl 06.30.

Kl 04.35 vakna eg av at mobilen bråka. Hæ, morgon alt no? Tenkte eg, og sjekka klokka, før eg innsåg at det ikkje var alarm-lyd, men ringetone som kima ut i rommet. Eit mobilnummer eg ikkje kjende - "sikker nokon som har hat ei fuktig natt, og ringer feil", fortsatte tankerekkja. Likevel trykka eg på knappen, og svara med eit noko søvingt "Hallo?"

- er det hos **Rosafamilien**? (ein mann, godt vaksen, med breidt strilamål i den andre enden - uforskamma klar og våken)

-eh, ja..? (korleis visste han kven eg var?)

- er det de som har skal ha eit badekar?

-eh... ja? (badekar? spole, spole)

- ja, eg er på veg frå Bergen til Voss...blabla....Gudvangen .....blablabla....levere på veg tilbake...blabla.....lurte på kvar eg skulle levere det?

hjernen prøvde å bearbeide informasjon, men klarte ikkje heilt ta stilling til kvar eg ville ha badekaret mitt... bortsett frå på badet.

-ja, eg har så stor bil med hengar, så eg kan ikkje køyre innover på småvegar. Kanskje eg kan setja det på busstoppet ved sentrum?

-jaudå, det kan vel gå, eg veit ikkje heilt.

-jaja, eg kan no ringa når eg køyrer frå Voss.

Fint, tenkte eg, og sovna medan eg freste av meg eit utal gloser over å verte vekt midt på natta, utan eit einaste ord om at det kanskje var ei ugunstig tid å ringe på..... Eg var dessutan sikker på at det kom til å vere langt på dag når mannen var på veg tilbake med badekaret.

Kl. 05.45 ringte telefonen igjen. Den samme snøvlande stemma sa "hallo?", og den samme, uforskamma friske strilen fortsatte som om ingenting var hendt..

-ja, no køyrer eg frå Voss. Veit du om det er høgdebegrensing på brua inn til bygda?
-mnei, det veit eg ikkje noko om (korleis skulle eg vite det, og korleis skulle ein kunne tenke på slikt før klokka eingong hadde passert null?)
-du skjønar, eg (underforstått: vogntoget, som tydelegvis var ei forlenging av han sjølv) er så høg, så eg vil ikkje risikere å verte ståande fast der.
-nehei, det skjønar eg.
-men det er eit busstopp ved stamvegen, er det ikkje?
-jau, det er det jo.
-jaja, men eg ringer vegvesenet og høyrer om dei veit noko om brua.
-fint det.

Denne gongen måtte eg berre le - det nytta ikkje å hisse seg opp. Eg var i tillegg nokså våken etter to nærast nattlege samtalar med den friske strilen. Berre ein halvtime seinare ringte han dessutan oppatt:

-ja, du - eg fekk ikkje tak i nokon på vegvesenet (kanskje ikkje så rart, folk var vel ikkje komme på jobb før klokka null?), så eg sette badekaret på busstoppet ved stamvegen (E16).
Dermed var det berre å slå av vekkerklokker, stå opp og få ungane i barnehagen, før eg og mannen henta tilhengar, og plukka med oss eit opp-ned badekar på eit busstopp ved E16 før klokka åtte om morgonen. Det vart forøvrig levert der 19 timar etter at bestillinga vart gjort på nett, og på pakkseddelen stod det "Leveres med første mulige avgang." Noko raskare enn dette kunne det neppe bli...

Bortsett frå ei lita advarsel om sjåførar med noko avkorta sosiale antenner, så kan eg absolutt anbefale ei bestilling hjå badeeksperten.no - berre pass på at du har litt å gå på når det gjeld søvn når dei plutseleg ringer for å levere varene. Dersom du ikkje kan motta dei vert dei nemleg returnert til næraste lager, og eg trur ikkje det er på langt nær så underhaldande å få dei til å levere for andre gong...

God helg!

Neste prosjekt!!

No trur du kanskje at eg er riv ruskande galen (og det har du gjerne rett i), men oppi hovudet mitt har eg ein veldig klar plan for eit prosjekt me skal setje igang med når me berre har fått til stova. Og badet. Og gangen. Og vaskerommet. Og har vaska ned heile huset. Og har flytta heim igjen. Og kanskje kvilt ut litt òg?

Eg har nemleg forelska meg aldeles i eit golvbelegg! Eg er jo ganske ofte innom butikkar som fører både veggar og golv-material for tida, og plutseleg stod eg og bladde i "we "heart" vinyl", som er Tarkett sine produktprøvar. Nytt av året er deira "urban collection", og der - der har dei gatekart over Manhattan! Eg MÅ ha det - berre MÅ ha det!!

I 2. etg, rett innom soverommet vårt, skal me lage til eit lite bad/toalett, slik at ein slepp vandre gjennom heile huset i nattlege ærend. Og på dette badet skal me ha Manhattan-golv. Me skal dessutan ha 3 kvite veggar og ein svart (eller evt stripete svart/kvitt). Kva me skal gjere med den grøne doen veit eg ikkje heilt, men kanskje det går an å trikse litt med spraymaling? Svart bengalakk-do må jo vere nokså unikt ;) Dama i butikken lova meg at golvbelegget kom til å vere der ca ut året, og har me ikkje laga bad til den tid, så skal eg eigenhendig kjøpe golvbelegget og ha det i opplag til me ein gong kjem igang.

Statusrapport frå byggjeplassen: - den flinkaste mannen har plata heile den nye delen av stova + ein vegg i den eine gangen idag. I skrivande stund pussar han pipa så den vert glatt og fin, istaden for strukturert og uhandterleg. veggane i stova er sparkla og nesten ferdig pussa. Teglsteinsmuren er fiksa, og eit lite skiferplatå er klart for ovnen som skal på plass igjen. Golvet er kjøpt, og ligg klart i gangen. Badekar er bestillt, og er venta levert innan ei veke. Førebuande arbeid til flislegging av badet startar ikveld. Å lage nytt bad er forøvrig det reinaste stafett-arbeid!

Sjå berre her;

-KNUS! veggar og golv.

-grav opp alt som var under golvet

-skaff røyrleggjar som kan fjerne gamle røyrdeler.

-grav litt meir.

-skaff røyrleggjar som kan legge nye røyrdeler

-grav på att singel og sand.

-skaff elektrikar som legg varmekablar.

-støyp golv. Vent 4-6 veker(!)

-skaff røyrleggjar som førebur alt som skal ligge inni veggane.

-skaff elektrikar som førebur alt elektrisk inni veggane.

-få på plass snikkar, som legg rupanel og gipsplater.

(etter 4-6 veker frå støypt golv)

-ha primer på veggane. la tørke

-ha fuktsperre på veggane. la tørke

- ha membran på golv og veggar

- ha fiberduk på golv og veggar

- nytt lag med membran.

-la tørke.

- legg fliser.

-la tørke.

-fugemasse.

-la tørke.

-silikon.

-la tørke.

-sett opp lister rundt dørar og vindauge? Maling?

-skaff røyrleggjar igjen (!) for å installere toalett, diverse blandebatteri og badekar.

-skaff elektrikar, for å koble på straum, lys og varmekablar.

-vask rundt

-NYYYYYYYYYYYYYYYYYYYYYYYYYYYT!!

Med lilla skrift er der me er ikveld.

tru kva kalendaren viser når me er komne til enden av lista....

Medan mannen jobbar i huset til langt på kveld, skal mor no finne senga. Når eg er så trøtt at eg har mest lyst å grine for den minste ting, då veit eg at det kun er søvn som hjelper!

Nattinatt :)

I am sparkling!

Melodi: I am sailing.
Hihi, slik ser stova mi ut ikveld, etter at mor har hatt seg ein runde med sparkel. Har prøvd å ta det grøvste av spikarhol, mens sprekker og slikt skal få vere. Det forklarer òg fråveret i eigen og andre sin blogg; no set me alle klutar til! God veke!