Soloppgang i november

Den siste tida har me hatt fleire kalde klare dagar her vest, og både soloppgang og -nedgang er vakre skue. Det øverste biletet er teke utanfor barnehagen der jentene går, med solstrålane som strekker seg over skylaget. Dei to nederste er på veg til jobb. Eg har alltid Ixus'en min (kompaktkamera) i veska, og i slike stunder er eg glad for det.

Ein litt lang laurdag i rosaheimen, med jenter i full fart og trøytte foreldre på slep etter. No skal mor kravle seg til køys, og satsar på at morgondagen vert lettare. Då skal eg og storesyster lage jolekrubbe ilag med andre 5-åringar i bygda, medan far og vetlesyster reiser til ei tante som treng litt hjelp med skulearbeidet.

nattinatt!

Fin start på helga

Det er jammen fredag igjen. Slutten på arbeidsveka, starten på helga. Fredag er ein god dag. Vanlegvis har eg fri, og gjerne jentene heime frå barnehagen, men idag har det vore full rulle. Fridagen tok me jo i starten av veka.

Etter mine tilmålte timar på jobb møtte eg mine 3 kjæraste til pizzamiddag på Voss. Deretter bar det avgarde til kinoen for heile gjengen. "Julenatt i Blåfjell" hadde jo premiere idag, og kinosjefen ville gjerne gjere litt ekstra utav det. Det passa jo perfekt saman med at me hadde blånisse-notar ute på prøve i musikklaget. Lønna var gratis kinobillettar til heile hurven, og det syns me var kjekt, både store og små.

Storesyster er av den typen som verkeleg lever seg inn i det ho ser, og dermed var ho skrekkslagen etter kort tid. Det vart gråt og tenners gnissel, så eg og ho måtte ut og lufta oss litt. Rosamannen seier ho er lik på mor si, og han har kanskje eit poeng? Eg må kanskje fortelja eg sjølv har ein vane eller evt uvane med å halde meg for øyrene når det vert skummelt på filmar eg ser. For eit par år sidan låg eg på senga og las Dan Brown sin "engler og demoner". Eg var i scena der hovudpersonen klatrar ned i krypta og plutseleg oppdagar skjelett og hovudskallar..... plutseleg oppdaga eg at eg låg i senga og haldt meg for øyrene mens eg las. Så - kanskje har mannen rett? Kanskje er jenta litt lik på mora :)

No har kvelden senka seg, og framfor meg står eit glas raudvin. Me har ei roleg helg framfor oss, og det kjennest bra. Bileta idag er eit fint zink-hjarta eg fekk til bursdagen min, og som no heng på kjøkkenet. Duken med broderiet kjøpte eg på den nye bruktbutikken på Voss (som eigentleg berre er eit permanent loppemarked - heilt supert!). Håpar de der ute har det fint, og får ei god helg!

Rimfrost og skodde

Då eg var på kurs for ei dryg veke sidan (hjelpemeg så fort tida går!) haldt me til i vakre omgjevnader på Gran på Hadeland. At dei var vakre fekk me bevist den dagen me ankom, men seinare vart det ein godt forvart hemmeligheit, grunna tjukk skodde som omkransa hotellet.


Samstundes var det blå grader på termometeret, og kobinasjonen av desse skapte vakre kunstverk rett utom døra. siste dag på kurs fekk eg knipsa litt bilder av desse små og store kunstverka, frå det store kvite treet til edderkoppvevet inni buskene. På nokre av bileta ser ein òg tydeleg kor tjukk skodda faktisk var.

Og det var kanskje like greit at me ikkje såg sola og den blå himmelen som låg utanfor vår vesle boble, for då hadde det kanskje vorte vanskeleg å konsentrere seg om budsjett, paragrafar og personalpolitikk?

Om du trykker på bileta skal dei komme opp i større versjon. Sidan eg ikkje klarte å velje ut berre eit par bilete måtte det bli i montasje-form denne gongen. Imorgon startar ei ny veke, og for oss jentene i rosaheimen vert det ein fridag. Når barnehagen har planleggingsdag og far har avsluttande eksamen med studentane sine er det mor som lyt ta fri frå arbeidet. Då er det fint at 4 dagars-veka kan snuast om til ei tysdag-til-fredag-veke.

Håpar du der ute får ei fin haustveke, midt i november!