2 syprosjekt er ferdige, kva no?

Det var i vår ein gong, då eg og mammo mi var på ekspedisjon til Stoff & Stil, at eg kjøpte eit stoff med grønt sommarleg mønster. Saman med det kjøpte eg eit sy-mønster merka "EASY". Resultatet av dei to komponentane, blanda med litt eigne tolkningar og nokre timar på arbeisommet ser du her:

Eit sommarskjørt i størrelse 6 år, som eldstesnuppa nok kan bruke både denne, neste, og kanskje endå ein sommar - om det varar så lenge, då. Det skulle eigentleg syast med elastisk tråd og 3 breidder strikk i toppen, men sidan eg og symaskina endå har eit gryande forhold og endå oppdagar nye sider ved kvarandre, valde eg å ikkje øydeleggje det med slike halsbrekkande forsøk. Mi løysing var derfor den trygge og gode "sy ein løpegang og tre strikken inni etterpå"-vrien.

Det siste prosjektet, som vart ferdig igår kveld, er sengesett og to ekstra puter til ei ekte prinsesse. Som seg høver sydde eg ein liten blondekant i skøyten mellom dei to stoffa i dynetrekket.

Stoffa er altså eit prinsessestoff og eit offwhite stoff med trykk av roser. Ein riktig søt kombinasjon, syns eg.

Dei to ekstra putene vart ei av kvart stoff, og prinsessa som skulle ta det ibruk ikveld var supernøgd med resultatet. Og - det ser endåtil ut som eg har nok stoff til å sy eit likt sett til vetlesyster! Då skal eg prøva å få saumane endå litt beinare, og spretta oppatt ein gong mindre.....

No veit eg ikkje heilt kva prosjekt eg skal leggje ut på. Skuffa med skjørt og kjolar er full, kassa med sengkle likeså. Om nokon har tips til ting som ikkje er så kompliserte å sy, men som likevel kan ha ein viss nytte- og/eller glede-effekt, så rop ut!

Sommarregn

I nesten 2 veker til endes har me på Vestlandet hatt det varmt og solrikt. Om ein ikkje visste betre kunne me like gjerne vore plassert på ei sydhavsøy. Og, misforstå meg rett - det har vore herleg!!

Men med så lang tid utan nedbør skrik naturen etter dei livgjevande dråpane ovanfrå. Hageblomane heng med nebbet, og dei nyslegne bøane til bøndene er delvis brunsvidde etter mangel på fuktigheit.

For ikkje å snakke om brannfaren som er overhengande i inn- og utmark! (Då mannen måtte til med vinkelslipar i klessnor-prosjektet sist veke stod eg med hageslangen og bløytte bakken rundt han, så det ikkje skulle vere nokon fare for hus og heim)

Ikveld kom regnet! Eg måtte nett ut på trappa idet dei fyrste dråpane kom, for det er noko heilt spesielt med sommarregn. Den utruleg friske lufta som plutseleg sler imot ein - akurat som regndråpane reinskar lufta på veg ned til bakken.

Om ei vekes tid kjem eg antakeleg til å vere halvfornøgd med at det framleis regnar, men akurat ikveld syns eg det er såre vel. Håpet er at det vert kort og intensivt, slik at omgjevnadane kan få sine sårt tiltrengte dråpar, og me likevel snart kan nyte solrike dagar igjen.

Imellomtida er det jo òg slik at ein med godt samvet kan kose seg med gjeremål innomhus. Ikveld har eg starta arbeidet med ei ny heimeside til grendalaget i bygda. Og som vanleg når eg skal igang med slike prosjekt er det nye program, nye verktyg og nye arbeidsmetodar. Fordelen er sjølvsagt at eg stadig lærer noko nytt medan eg jobbar mot målet.

Litt nytt (og noko daudt) i heimen

Helga som har gått har vore tileigna sol og sommar, med badeturar hit og dit i selskap med gode vener. Rosamannen har hatt litt ferie og skal ha litt meir, men me jentene skal til våre daglege virke i 4 dagar til før det er ferie. Eg og storesyster hadde jo meir som ein tjuvstart på ferien sist helg, og når me fyrst var i Oslo måtte det jo verte litt shopping òg. Eg hadde ikkje planlagt det, men når me var på Kremmerhuset for å kjøpe ei gåve til veninna mi som me budde hjå, kom eg over eit par gode tilbod.

På porten inn til hagen vår heng det no eit "Velkommen"-skilt. Det var kanskje i minste laget til å henga på ein port, men så er det jo fint å ynskje folk velkommen med det samme dei kjem inn, istadenfor når dei kjem inn på kjøkkenet eller i stova ;)

Noko anna som fekk vere heim var 6 søte melaminkoppar. Slike koppar har eg sett på mange gonger i den kjempefine butikken Patina (med denne bloggen), men det har liksom ikkje blitt til at eg kjøpte dei. Når dei stod framfor meg på Kremmerhuset og kosta berre 10 kr pr stk, så klarte eg ikkje gå ifrå dei.

Det eg eigentleg hadde tenkt å sjå etter i hovudstaden var ein eller to sommartoppar til meg sjølv. Men, som så ofte før vart det litt kle til ungane (eit lagersalg med kle til 25 kr plagget kunne eg heller ikkje gå rett forbi), og tinga ovanfor til meg sjølv. Det skjer noko merkeleg med prioriteringane idet ein får ungar i huset ;)

Nokon som ikkje hadde så godt av den gode sommarvarmen me har fått kjenne på i halvannan veke, er stemorsblomane mine. Etter helga hang dei tevande ut over kanten, og var meir eller mindre daude heile gjengen. Eg har prøvd å gjenopplive dei, men satsar på at regnet som er spådd den komande veka kan gje dei livslysta tilbake.

Det har forresten vorte nokre timar på arbeidsrommet den siste tida, fordi jentene våre strevar med soving og kveldsro i varmen. Minstesnuppa har dessutan funne ut at det å komme seg ut av senga sjølv gjev uante moglegheiter. Aldri så gale at det ikkje er godt for noko - mor har fått sydd! Resultat av det kjem kanskje i neste innlegg?

God veke i vente!