Effektive dagar i heimen!

Etter gårsdagens mobilblogging kjem det vel ikkje som noko overrasking for nokon at me målar hus i helga. Me er så heldige at det finst eit stillas innan familien, som til alt overmål var ledig no når me ville igang med å måla huset igjen. Med det vèret som vart lova for langhelga fann eg og svigermor ut sist sundag at her var det berre å "køyra på".

Som sagt så gjort; Svigers hadde høve til å ta turen allereie igår, og dermed ordna Rosamannen seg fri. Stillaset kom opp på nokre timar, og så kunne me finna fram kostar, maling, og for Oda sin del - gamle utslitne regnkle. Ho ville sjølvsagt vere med på arbeidet, og haldt ut ei heil stund.


Då ho var ferdig hadde ho fått omtrent like mykje måling på hendene og kleda som på veggen, men ho var iallefall fornøyd med å ha fått bidra.

Med stillas i 3 høgder kjem ein ganske langt over bakken, og når ein står ytterst til venstre er det faktisk 8 meter ned. Eg hadde meg ein liten tur ut for å sjekke utsikta, men haldt meg ellers der eg skulle vere - med finarbeidet rundt vindaugene. Det er altså meg på bildet under, i mine herlege målarkle ;)

Det er ikkje så verst å måle hus når det er varmt og fint, ein er 3 stykker som kan stå i stillaset og ei som kan springe etter Hedvig på hennar mange små og store utflukter.

Med denne effektiviteten vart me ferdige med den største veggen idag, og ikveld har stillaset komme opp på nedsida av huset, der det ventar meir arbeid. Veggen på oppsida kjem me ikkje til å måle i denne omgang. Me er litt usikre på om kledninga må skiftast, om me skal flytta på dørar og vindauga osv, og det har ikkje nokon bråhast visuelt sett heller, for oppsida er det berre me (og eventuelle gjester på uteplassen) som ser.

Medan karane flytta stillas fekk eg (eller tok eg meg) forresten tid til å gå over uteplassen med terasserens. No står den der nyfjelga og fager, og ventar på eit strøk eller to av melkekvit flügger terassebeis. Leveggen der oppe har eg òg tenkt å måle, men det får eg kanskje venta med til huset har fått sitt...

Imorgon tek me fri, og legg turen til vener i Bergen - det tek seg ikkje så bra ut å stå med målearbeid 1. pinsedag, og litt tid skal ein jo òg ha til å berre nyta godvèret og ha det kjekt med ungane.

God pinse!

Uteplassen frå ein ny vinkel

..og her er eg ikkje så ofte. På 3. høgda i stillaset - øverst i mønet på huset - er det luftig og fint!

Eg kan sy!

- og eg håpar det kan vere min nye hobby, og ikkje berre eit eingongstilfelle.

Idag kunne Storesyster gå i barnehagen i heimesydd fleece-bukse, og eg trur nesten me var like stolt, begge to. Stoff og mønster vart kjøpt på Stoff og Stil for veldig lenge sidan (var det ifjor haust, tru?), men eg har liksom aldri komme igang. Men, for eit par veker sidan rydda eg scrappesakene mine ned i diverse skuffer og boksar. Eg føler meg heilt tom for den typen kreativitet (men har eit håp om at kanskje den kjem tilbake ein gong).

Istaden kom symaskina eg har arva frå mor mi fram på bordet. Å sy er òg kreativt og skapande, men eg treng liksom ikkje finne opp kruttet kvar gong. Nokon har faktisk funne det opp, så eg kan kose meg med å finne kule stoff og fargar, og fylgje eit mønster for det eg vil lage. Iallefall no når eg er i startgropa.

Seinare, når/hvis eg er meir erfaren klarar eg meg kanskje utan punkt-for-punkt beskrivelsane til S&S, som eg likevel har problem med å forstå. Nokre begynnarfeil er heller ikkje til å unngå... Dei to framstykka på buksa vart heilt identiske istadenfor speilvendte, så eg måtte klyppe ein gong til. Heldigvis hadde eg litt ekstra stoff å ta av. Dessutan er det lommer på buka - men den eine av dei er ei typisk "oppover-lomme", der ingenting kjem til å ligga trygt..


Sist eg var på S&S hadde eg mann og barn med meg. Eg lova mannen at eg skulle springe igjennom butikken omtrent på like lang tid som han og ungane ville bruka på å eta kvar sin is utanfor. For å sei det sånn, så rakk både rosamannen og ungane å ete isen sin, for så å bli grundig lei alle hyllemeterane med stoff, medan mor sjølv vart ein tanke stressa og heit i toppen.

3 forskjellige stoff enda eg opp med, til to prosjekt som eg håpar å kunna visa fram om ikkje alt for lenge...

Til slutt må eg berre visa fram det fine "Krossamerket" som eg fekk av den snille snille sjefen min på jobb idag, etter den før omtalte produksjon av plakatar og diverse trykksaker til Vossakyrkjemessa. Merket var mindre enn eg trudde, og veldig fint. Det kan dessutan brukast som anheng istadenfor nål.

Tusen takk for dei kjekke kommentarane eg har fått, og ha ein god tysdagskveld!

Arvekjolar, loppis og litt

I rosaheimen er det storesyster som er mest rosa av alle. Ho rett og slett elskar rosa, og kunne utan problem hatt berre rosa plagg. Me har klart å snike inn litt andre fargar òg, men eg trur ikkje det er mange dagar ho er "rosa-fri". Sist me var hjå svigers var difor gleda stor då bestemora kom med heile 3 rosa kjolar til den vesle prinsessa vår.

Denne her er det ei tante som har brukt, og storesyster hadde den på seg igår då me var på aktivitetsdag og loppis i nabobygda. Ein av aktivitetane var kortverkstad, og ho fekk laga seg eit kort - som sjølvsagt var rosa :)

Vetlesyster anar me er eit litt anna kaliber. Ho syns det er kjempestas med bilar og traktorar, og ho er så vill og galen som storesystra aldri har vore! Iallefall, på loppisen fann me ein trø-traktor til ein 50-lapp, etter at den vesle snuppa haldt på å gå laus på ein stakkars gut som hadde vore så frimodig å ta med seg sin eigen traktor på aktivitetsdagen.

Storesyster fekk to andre kjolar òg hjå bestemora, og begge desse var omsydd frå konfirmantkjolen ho sjølv hadde på slutten av 60-talet. Den var veldig rosa, med kvite prikkar. Med andre ord - heilt "in" i dag. Ekstra stas er det at den snille Oldemora til jentene har sydd dei to kjolane. Den eine ser du på bildet over, den andre har ho ikkje prøvd endå, men den har kvitt liv med litt krage, og er knallfin!!

Til slutt eit bilde frå Oda sin utflukt opp på den høgaste bakketoppen heime på garden til foreldra mine. Ho sprang som ei fjellgeit opp bakken - 3 gongar på rappen! Der oppe følte ho seg verkeleg "on top of the world".

Ikveld har eg starta på noko som eg håpar vil verte ein ny og kjekk hobby. Eg håpar å få gjort det fyrste prosjektet ferdig imorgon kveld, og då har eg plutseleg stoff til eit nytt blogginnlegg.

Imellomtida - ha ei god ny veke i vente, og viss akurat DU legg att ein kommentar hjå meg, så kan eg kanskje få sjå nokon få av dei nesten hundre som er innom bloggen min. Besøkstal er kjekt, men kommentarar er reinspikka næring til bloggelyst ;)

nattinatt!