Strikkeveske

Det er ikkje akurat strikking eg driv med for tida, men bortimot kvar einaste kveld har eg eit hekletøy mellom hendene, og føler eg er godt igang med det som skal bli eit teppe i bestemorsruter. Til no har eg hatt hekletøyet i ein liten plastpose, og er sikkert ikkje åleine om det. Plastpose er vel og bra, men då Trollkåno kom med ei av sine eigenproduserte strikkavesker vart eg hoppande glad!

Veska er rosa og fin, akurat slik eg likar det


Og har rikeleg plass til dei forskjellige nøsta eg treng til lappane mine.

Dessutan er det utruleg praktisk med eit lite rom der saks, nål og heklenål kan ligge når dei ikkje er i bruk, istadenfor at dei vert vikla inn i tråden.

Praktisk og fin - akurat slik me likar det! Tusen takk, mor :)

Kan jo slenge på ein liten oppdatering på vesle Oda mi, som sist veke var hardt ramma av vannkoppar. Denne veka er ho framleis ikkje frisk, sjølv om me trudde det og sendte ho i barnehagen på mandag. Etter to timar vart eg nok ein gong kalla tidleg heim frå jobb fordi vesla var dårleg, og tysdag morgon var me hjå legen. Han konstaterte at som fylgje av infeksjonar og sliten kropp har snuppa fått leddbetennelse og magekatarr. Ikkje så mykje medisinar, men ei ny veke heime i ro og fred. Eg fekk sjukmelding, men når bestemora og bestefaren lurte på om ho ville komme på besøk hjå dei nokre dagar var det ikkje nei i hennar munn, og då sjølvsagt ikkje i vår heller. Difor er ho no sendt på helseferie, medan me (nesten) bekymringslaust kan gå på jobb og Hedvig er i barnehagen.

Og folkens - no er snart våren her!!

Med rak rygg

Verken eg eller rosamannen ragar spesielt høgt over bakken. Han litt under 1.70, eg litt over. Likevel - i trappa opp til 2. etasje har me måtta gå krokrygga både opp og ned. Eg for min del har snudd midt i trappa og rygga ned kvar morgon når eg har komme med Hedvig på armen i halvsøvne, for ikkje å ta overbalanse og gå på trynet.

No er den tida over! Igår gjekk mann og svigerfar laus med sag, og skar ut eit stort hakk i "arkje". Resultat: Ei ny verd med gang og trappegang som føles mykje opnare. Her ser du òg platearbeidet som er gjort siste vekene. Eit voldsomt putlearbeid som tek mange timar og må gjerast med nøyaktigheit og kreative løysingar når ein skal tilpasse nytt til gammalt, der ingenting har rette vinklar. No er trappa retta opp og sett fast igjen, og med den nye opninga har me òg plan om å setja opp noko stensle slik at ingen søte små kan vippe ut over kanten og rett i golvet.
Bileta er ikkje så gode, då det er dårleg lys over heile linja. Planen er spot'ar enten i taket eller på veggen øverst i trappa. Me såg igår med arbeidslys at det opna rommet veldig. Men før den tid skal me opp med tapet, maling, meir plater og lister både her og der. Eit stykke fram, men samtidig er me veldig nøgd med at det går så fint framover!

Eit par fine funn har me òg gjort då me skulle rydda "arkje" for å sage hòl. Dei skal eg komma tilbake til ein annan gong.

Tusen takk for alle god betring-helsingar til Oda mi. Imorgon satsar me på at ho er barnehage-klar igjen!