fredag 27. februar 2009

touch-metode

På vidaregåande (herlighet, det er over ti år sidan!) hadde me eit eige IT-fag, ein time i veka. Ein av tinga me lærte der var touch-metoden, altså det å kunne skrive med alle fingrane på tastaturet utan å sjå. Me hadde forskjellige modular for å få inn alle bokstavane, og kvar modul vart avslutta med ein hurtigheitstest.

Annika har funne ein slik test, og eg klarte berre ikkje la være;

Du skriver 415 bokstaver per minutt
Du har 87 riktige ord og
du har 2 feile ord

Ikkje fullt så raskt som Annika, men godt nok :)

Idag er det heimedag med jentene mine, og vekas handling står på programmet. Etter å ha henta Oda tidleg i barnehagen igår pga oppkast er me litt nervøse for omgangssjuka, men foreløpig har ikkje me andre blitt sjuk - bank i bordet!

God fredag!

onsdag 25. februar 2009

Eg hadde ein gong eit golv...

Det skjer fort i rosaheimen når det fyrst skjer. Etter lengre tids stillstand er me plutselig igang igjen med oppussingsprosjekt, og det til gangs. Som eg skreiv i forrige innlegg fann me ut det var på tide å setje igang med yttergangen. Som tenkt så gjort. Igår ettermiddag var svigerfar på plass, og med hjelp frå ei svært arbeidsvillig Oda sette karane igang med å rive opp golv. Fyrst eitt.

..så eitt til..



..og til slutt taket i kjellaren. Skal det vere så skal det vere, og tek ein fyrst opp golvet så er det jo best å gjere det skikkeleg.

Slik ser mitt kvite kjøkkengolv ut når to arbeidskarar har vore innom matstasjonen. Eg fekk gleda av å støvsuge 4 gonger og vaske litt attpå, men kva gjer ein ikkje med smil om munn når me no er igang!


Trappa heng i lause lufta! Eg torde ikkje fylgja Oda opp ikveld, det måtte fint pappaen gjere. Isolasjon er på plass, og i skrivande stund er sponplatene til underlag so og seie klar. Flinke karar!
Me har dessuten (med god hjelp frå ein praktisk og erfaren svigerfar) funne ei genial løysing på garderobeproblemet! Det gjer at me må leggja om nokon andre planar, men det skal nok gå bra. Eg har dessuten byrja å lure på om me skal male tømmeret i gangen òg........?

måndag 23. februar 2009

Kanskje ny gang (ein gong)?

Omtrent sidan denne tida ifjor har planen vore å pusse opp stova vår. Etter at snikkaren hadde gjort sitt i sommar vart ønsket om å pusse opp endå sterkare, sidan me fekk skifta vindaugene i stova. Etter planen skulle me vore godt i gang no, men av ymse årsaker er stova akurat like shabby (og akurat like lite chic) som den har vore.

Etter kalde vinterveker er me i ferd med å gjere alvor av å skaffe oss varmepumpe. Fleire me kjenner lovar oss gull og grønne skogar - eller iallefall ein nokonlunde stabil innetemperatur - når me får installert eit slikt vidunder. Men for at me skal få full effekt av ei varmepumpe har me bestemt at me må gjere noko med gangen vår.


Gangen er det fyrste rommet ein kjem til i huset vårt. Den er bitteliten, svært sliten og iskald! For å sei det på ein annan måte: vatn på flaske er ikkje lenger flytande etter å ha stått på golvet der ei vinternatt.... Men no skal det bli andre bollar. Imorgon vert det kjøpt golv, og om planar og gode makter står oss bi kjem me igang igjen!

No jobbar topploket på høggir, planar kjem og går, ein og annan frustrasjon bles igjennom. Frustrasjonane gjeld for det meste den svært begrensa plassen me har å boltra oss på, påfylgd av forsøk på løysingar for å få plass til det me treng utan at det ser så fullt ut.

Med andre ord, det kan fort verte for mykje å tenkja på og for lite å tenkja med. Eg håpar me er igang igjen no, for å bu i eit oppussingsobjekt utan å pusse opp, det er ikkje mykje inspirerande.

Happy mandagskveld!

Related Posts with Thumbnails