Den fyrste vinterdagen

Den aller fyrste vinterdagen er magisk. Snøen som etter fleire fåfengde forsøk endeleg legg seg som eit vakkert kvitt teppe over landskapet. Skjuler brunt og svart, rot og skit, gjer verda ryddig, glatt og kvit.

4-åringen står i sofaen og kikar ut glaset, og er i ekstase. "Mamma, det er snø - eg vil ut å gå på ski!" seier ho, lenge før fleire me kjenner sansynlegvis har stått opp. Omsider kler me på dei gode dressane, sko, hue, vottar - men ikkje ski. Det får halda med akebrett, når snøen ligg i eit så florlett lag at den knapt dekkjer .


Storesyster er full av adrenalin, glede og arbeidslyst. Å dra vetlesyster opp bakken på akebrett er vel inga sak! Vetlesyster humrar over denne nye opplevinga, og sit fint i akebrettet så lenge det går framover. Sidan har ho ikkje tid - her er så mykje som skal utforskast!


Tilogmed litt posering for fotografen går an når ein er i så godt humør! Er det årets jolekort-bilete som plutseleg dukka opp?


Vel heime i hagen må det kokkelerast. Vatn, snø, gras og jord i herleg blanding - perfekt, syns Oda.


Hedvig gjev seg ende over, ligg i snøen og myser rundt seg...

Tenk å gleda seg slik over noko så enkelt som eit par cm krystallisert vatn?? Eg håpar på ein god vinter, og ei god helg!

Eg har ein draum

... ein draum som blir sterkare og sterkare for kvar dag. Eg har ein draum om å få utdanna meg og jobba med grafisk design, med utforming og oppsett, fargar og uttrykk. Tenk å få driva med det heile tida, og tilogmed få betalt for det!!

Pr idag har eg ein jobb der eg innimellom arkivering, fakturering og telefontid får kosa meg med små og litt større prosjekt - plakatar og brosjyrar, invitasjonar og program. Av aller enklaste sort, men likevel storkosar eg meg når eg får halda på med slikt. På sikt (dvs når mannen er ferdig utdanna og tjener pengar som gras - yeah right!) har eg lyst til å ta meir skule innanfor dette feltet.

Men akurat no, og kvar einaste dag i ein månad framover - skal eg gle meg til å reisa på 3-dagars kurs i grafisk design. Eg skal til sjølvaste tigerstaden, bu hjå ei god veninnne, sitje på toget i 5-6 timar med interiørblad, musikk, og berre meg sjølv å tenkje på. Om dagen skal eg forhåpentlegvis læra litt meir om grafiske verkemiddel og korleis ein brukar dei for å oppnå det ein vil. Om kveldane skal eg nok sikkert ta eit glas raudvin i godt selskap, og kosa meg med god mat og god prat.

Om draumen min har sjangse til å verte realitet veit eg ikkje. Kanskje har eg ikkje evner nok, kanskje er eg ikkje kreativ nok, kanskje har eg ikkje vilje nok? Men, draumen er der, og med kurset eg har i vente håpar eg å få eit bittelite glytt inn i kva draumen inneber.


Tusen TUSEN takk for alle dei nydelege tilbakemeldingane eg fekk på forrige innlegg - eg vert så glad!