laurdag 12. april 2008

Vakre blomar


Det var ei tid då alt grønt i mitt hus daua vekk med det same. Sjølv kaktusar klarte eg på underleg vis å ta livet av! I fleire år skydde eg plantar og blomar som pesten.


No er det ei anna tid. Eg skal ikkje skryte på meg å ha grøne fingrar, men no har eg faktisk klart å halde liv i alpefiolen min i eit halvt år - den blømer for andre gong!
Det gjer òg ein kvit gerbera eg kjøpte i vinter, tenk det! Det hjelper sjølvsagt å vatne dei ;) Nokre plantar har gått dukken den siste tida òg, men no har eg iallefal lyst til å prøve, og stadig går eg og kikar på nye vakre blomar i butikken. Tru om det går bra med ein orkidè?

fredag 11. april 2008

Vårreingjering

Som seg hør og bør fann Oda ut at sykkelen trong ein liten puss og vask i anledning våren. Pappen var inn og henta bilsvamp med såpe, og litt vatn. Djupt konsentrert skreid ho til verket, og jammen skein det av motorsykkelen då ho var ferdig!









Etter hardt arbeid smakar det godt med litt småmat på trappa

Eg har vorte scrap-lifta!

Scrap-lifting er altså når nokon har ein idè som er så god at du overfører den til ditt eige arbeid. Ein ting er å jobbe ut frå skisse, då kopierer du oppsettet, og det går eigentleg ikkje under scrap-lifting (trur eg). Men når du tek heile idèen, og set inn dine eigne bilete, kanskje med nokre variasjonar i dekor - DÅ er det scrap-lifting.


Den faste lesar hugsar kanskje "Tida går" med bilder av Hedvig frå 0-6 mnd.
Ein med-scrappar har lånt idèen min, og det flotte resultatet ser du her.
Eg føler meg ganske beæra over å ha vorte lifta!

onsdag 9. april 2008

Lite kryp, stor skrekk

Alle ting har ei bakside, og dei siste to dagane har eg vorte minna på kva som er bakdelen med våren; All verdens skumle ting vaknar opp att frå dvala, og kjem for å plage meg! Eg snakkar insekt, edderkoppar, alt som kravlar og kryp på stadene eg minst ventar det, og aller minst ynskjer det.

Ved leggetid igår, akurat idet eg la Hedvig opp i senga, spratt det fram ein diger edderkopp på soveskinnet. Om han hadde loge i senga, eller om han (skrekk og gru) kom frå teppet som eg akurat hadde henta veit eg ikkje. Men rommet vart fylt av ganske mange desibel som følge av sjokket. Heldigvis var mannen der, og kunne redde oss alle frå udyret. I mange minuttar etterpå var pusten ujamn, hjertet banka med dobbel hastigheit, og frysnigar gjekk gjennom kroppen.

Idag tidleg måtte eg ordne opp sjølv, då eit digert udyr sat på taklista over dusjen. Heldigvis var det ikkje i bevegelse, så eg fekk tid til å summe meg litt. Under det hang diverse kle til tørk, og eg såg med gru for meg scenarioet med å leite etter uhumskheiten mellom reine babykle. Eg manna meg opp, og fekk flytta kleda. Så henta eg moppen, med skaft på over halvannan meter - den ville passe fint som mordvåpen. Drog pusten djupt og støyrde til så hardt eg kunne - og traff! Men sjølv då, på god avstand, klarte eg ikkje halde tilbake skrekkhylet idet greiene datt ned. Prikkingane og frysningane i kroppen ville ingen ende ta, og plutseleg er eg ikkje SÅ glad for våren lenger...

tysdag 8. april 2008

Bestevener

Har jobba med denne ein kveld før òg, men ikveld fekk eg iallefall gjort den ferdig, med tittel og masse bling!
Oda har to søskenbarn som er hennar beste vener, i barnehagen og på fritida. Kvar einaste dag snakkar ho om alt det kjekke dei har gjort eller skal gjere ilag, og det går knapt ein dag utan at ho spør om besøk med eller utan overnatting. Hadde det vore opp til ho hadde dei vore ilag 24/7 :) Her er den eine, som i tillegg til å vere god veninne òg er eit stort førebilete, med sine 5 år.

måndag 7. april 2008

Kven kjem fyrst ned?


Litt dårleg bilde (mobilkamera), men eg måtte flire litt over dette skuet. Det ser verkeleg ut som mannen nederst sagar stamma den øverste klatrar i! Frå ein annan vinkel viste det seg heldigvis å vere feil :)

søndag 6. april 2008

Finn ein feil

Idag skulle eg lage lappar. Faktisk, så skulle eg lage dobbel porsjon, for å vere sikker på at det vart nok kaker til alle som ville ha. Eg hadde kjøpt inn alt eg trengde til røra, men noko må ha skjedd....



Ja, me har vel feilberekna litt med egg, då... Heldigvis har me familie rundt oss på alle kantar, og heldigvis har nokon alltid "litt ekstra" ståande i kjøleskapet, så me vart redda denne gongen òg. Ein aldri så liten haug med lappar vart det - og berre èin til overs etterpå :)



Og til slutt, inspirert av Barnas Supershow - Oda Superkokk! Min gode hjelpar i nattkjole, forkle og strømpis :)
Related Posts with Thumbnails